E kaluara e lavdishme e UP-së, motiv për zhvillim dhe suksese të reja!

Jo pse jemi më të mirët, më meritorët apo më kontribuues se sa brezat tjerë, sepse të gjitha brezat kontribuuan në mënyrën e vet gjatë kohës së tyre, në përmbushjen e misionit të gjeneratës së tyre, por sepse gjeneratës sonë iu dashtë t’i kompozoi dhe kombinoi metodat dhe praktikat e lëvizjeve atdhetare e intelektuale me metoda e praktika politiko-ushtarake që s’ishin përdorur nga brezat e mëhershëm. Kontribut ky që ishte në interes të përgjithshëm të atdheut dhe lirisë e pavarësisë së tij.

I tërë ky kontribut dhe aktivitet në dy dekadat e fundit është përbirua dhe mbijetoi duke u mbështetur në dy institucione të veçanta: Institucionin Politiko Ushtarak të UÇK-së, (tani institucion historiko shkencor.) dhe Institucionin e Universitetit të Prishtinës. Të dy këto institucione natyrshëm e plotësuan, mishëruan dhe ndihmuan njëra tjetrën në përmbushjen e vizionit dhe misionit të tyre. Unë dhe brezi im ishim me fat që përjetuam këtë rrugëtim deri në shpalljen e pavarësisë së Kosovës.

Sigurisht që sot në shënimit të 49 vjetorit të themelimit të Universitetit të Prishtinës, e do rendi që të ndalemi e të flasim më shumë për kontributin e Institucionit të UP-së. Nuk ka dyshime që rrugëtimi dhe zhvillimi i UP-së është më i veçanti jo vetëm ne rajon por edhe më gjerë. Të veçantë dhe madhështor e kanë bërë dhe e bëjnë studentet e tij, të cilët kanë qenë shpirti dhe fuqia e UP-së.

Për të ardhur deri këtu ku jemi sot, u dha shumë djersë, gjak, mund e sakrificë, dhe e kemi obligim ti kujtomë studentët, profesorët dhe rektorët që nga brezi i viteve ‘68, ’81, ’89 e deri tek 1 Tetori i vitit 1997.

Pikërisht atëherë kur represioni pushtues arriti kulmin, atëherë kur regjimi serb mendonte që kishte shkelur e shtypur çdo gjë në Kosovë, atëherë kur mbylli dhe Universitetin e Prishtinës dhe shkollat fillore dhe të mesme, pikërisht atëherë këto dy institucionet njëzëri reaguan dhe u bashkuan për ti dhënë kundërshtimin më të organizuar politikë, shoqëror dhe ushtarak këtij regjimi.

Pikërisht atëherë u bashkuam studentët, profesorët e rektorët e UP-së me strukturat tashmë të themeluara të UÇK-së. Ky ishte momenti historik i këtyre institucioneve dhe ky ishte pikërisht çasti i materializimit të këtij bashkimi. Ky ishte 1 Tetori i vitit 1997, që po shënonte jo vetëm fillimin e vitit të ri akademik, por edhe fillimin e një kundërshtimi të vendosur kundër regjimit, fillimin e bashkimit të të gjitha grupeve liridashëse dhe guximtare në një lëvizje të përbashkët çlirimtare.

Për mua e brezin tim që ishim rreshtua me UÇK-në e Adem Jasharit ky bashkim ishte një moment që garantonte fitoren e madhe. Tani  në llogoret e luftës për liri ishim së bashku me studentët e profesorët e UP-së. Tani përveç pushkëve dhe barotit tonë kishim edhe zjarrin e rinisë studentore, mendjen e profesorëve të UP-së dhe besimin e popullit tonë liridashës.

Secili nga Ne që e provoj dhe e kaloj këtë periudhë kohore, ka përjetimet, përshtypjet, emocionet dhe kujtimet e veçanta të këtyre ngjarjeve. Edhe unë ndjehem i lumtur dhe krenar që i takoj kësaj gjenerate, aq më tepër që sot jam edhe pjesë e UP-së. Prandaj shpreh respektin për të gjithë ata që kontribuuan për organizimin e këtyre ngjarjeve dhe shpreh falënderim dhe mirënjohje të veçantë duke i rikujtuar gjeneratave të reja të studentëve për këtë pjesë të lavdishme të UP-së.

Duke kujtuar me nostalgji ato ditë, në këtë përvjetor, përgëzoj të gjithë studentët për suksese dhe një vit të mbarë akademik dhe uroj të gjithë profesorët dhe menaxhmentin e UP-së, që të kryejnë me dinjitet detyrat dhe obligimet e tyre, dhe të gjithë së bashku të ndihmojmë UP në rritjen dhe zhvillimin e tij.

I inkurajojë të gjithë që duke kujtuar me krenari të kaluarën e UP-së, të grumbullojmë energji të reja pozitive, për ti përballuar me sukses të gjitha sfidat që dalin para institucionit tonë kryesorë të dijës e shkencës, duke pasur besimin e plotë që brezat që po dalin nga UP do ti shërbejnë me nder e profesionalizëm vendit drejt zhvillimin dhe ndërtimit të tij.

Urime 49 vjetori i themelimit të Universitetit të Prishtinës.

Ferat Shala, shënim autorial me rastin e 15 shkurtit 49 vjetorit të themelimit të UP-së

Prishtinë,15.02.2019.